తొర్రి పన్ను

నవ్వే వెన్నెల బుగ్గ
సొట్ట పడ్డట్టు, యిక
నువ్వు ఇకిలించినప్పుడల్లా నీ పెదాల మధ్య నుంచి
ఒక నక్షత్రం రాలి దానిమ్మ గింజై ఎటో ఎగిరిపోతుంది

ఆరి భగవంతుడా నా పిల్ల పిడుగా
తొర్రి పన్నోడా అని నిన్ను రేపు
తోటి పిల్లలు వెక్కిరిస్తారు కానీ

నాకే, రాబోయే
నా బోసి నోరు గుర్తుకు వచ్చి ఇప్పుడే

నా హృదయ వక్షోజాల నిండుగా నిండిన
తల్లితనపు పితృత్వ తొలి పాల హోరూ
శరీరమంతా ఒక తొలి ప్రేమ జలదరింపూ

నా కనుల నిండా ఒలికిన
నా పురాస్మృతుల, తొలి
మలి మృత్యు గులాబీల గుబాళింపు-