పర్లేదు

దయగానే ఉండు, పర్లేదు
విసిరిన రాళ్ళని పూలుగానే అందుకో
నెత్తురు హారాలుగానే అలంకరించుకో
దయగానే ఉండు, పర్లేదు

రాత్రైతే నిన్ను నువ్వు దాచుకోడానికి
నీలో నువ్వు ఒక నీటి నిశి పందిరిని
అల్లుకో: అది కన్నీళ్ళసమాధి అయినా
సరే, గాయాల లోగిళ్ళు అయినా సరే -

పర్లేదు
దయగానే ఉండు లోకంతో జనంతో:
గుర్తుంచుకో- దీపం చుట్టూతానే
నువ్వు చూడలేనంత చీకటి ఆగి
దాగి ఉంటుంది. ఆరిపోయి కూడా

మిగిలిపోయి నలుమూలలా సాగే
ఆ దీపపు ధూపం నీవే! సమయం
ఆసన్నమయ్యింది, యిక మూయి

నీ నీలి పద నీలాల కనులను-