బహుశా

ఇలా అంతమౌతుందీ రాత్రి.

చీకటి - ఆకుల వలే- గదిలో రెపరెపలాడితే
ఆకులపై రాలే నీటి శబ్ధాన్ని వింటావు మరి
నువ్వు: శరీరంపై తేలే వెచ్చని కంపనతో-

బహుశా, ఒక వెన్నెల వీచిందేమో బయట
బహుశా, ఒక సీతాకోకచిలుక వాలిందేమో
చల్లటి వెన్నెలపైనా. బహుశా,

తేమ అంటిన రెక్కలపై, తిరిగి రాత్రే పరిమళపు  
పుప్పోడై వెదజల్లబడిందేమో ఇక్కడ. బహుశా

ఇవేమీ కాక, ఒక పూల వనమే నిశ్శబ్ధంగా 
తగలబడిందేమో ఇక్కడ. ఇక్కడే
అంతమయ్యీ కాని ఒక రాత్రి ఒక
'బహుశా'గా మిగిలిన చోట. రా రా

నువ్వొక సారి ఈ శరీరాన్ని ముట్టుకుంటే
ఇక నిశ్చింతగా తగలబడిపోతాను-