నీకు సంబంధం లేని...

శిఖరం విరిగి
సరస్సులో పడిన ప్రకంపనం

వలయాన్ని చుడుతూ
వలయాలు, వృత్తాలుగా-

శిరస్సూ విరిగి
అరచేతులలో పడిన శిక్షణం*

కొలవలేవు ఆ వృత్తాలను
కనుగొనలేవు ఆ ఆదిమ
వలయ చలన బిందువును

ఆ చూపుడు వేలుతో ఎవరో
నుదిటిని దింపిన పదునైన
సన్నటి చిర్నవ్వు అంచును-

ఇది రాత్రుళ్ళు నన్ను
అవిశ్రాతంగా వేటాడే
అమృత విషసమయం

వెళ్ళిపో ఇక్కడనుంచి: నేను

నిదురిస్తానో, నిద్రమాత్రలతో
మధుపాత్రలతో తూగుతానో

నీకేం సంబంధం? నువ్వు చదివే
ఈ పదాలతో నీకేం అనుబంధం?

______________________________
శిక్ష+క్షణం = శిక్షణం: శిక్షించబడిన క్షణం, శిక్షా క్షణం.