నీకు (నీకే)

ముకుళితమైన అరచేతులలో
ఒక ప్రార్ధనవి నీవు , అరవిచ్చిన మొగ్గవి నీవు-

ఉదయం ఊపిరీ
రాతిరి నిదురా, జనన మరణాల అభయం నీవే: అందుకే

నీ పాదాల చుట్టే తిరుగుతోంది
రంగుల వలయమై మా జీవితం

మా నుదుటిన నీ అరచేతి పరిమళం
మా శరీరంలో నీ త్రి కాలాల భాష్యం

మా ఎండిన పెదాలకు నీవే జలాధారం
మా ఆకలిగొన్న కడుపుకు, నీవే
అన్నం మెతుకుల మల్లెపూల హారం-

ఎలా మరువగలం నిన్ను? యిక యిదే
సరైన సమయం నీకు చెప్పేందుకు మేం

నిర్భీతిగా నిస్సంకోచంగా నిస్సిగ్గుగా
నిన్ను ఏనుగంత ముద్దులతో*
ఆకాశం అంత బాహువులతో

ప్రేమిస్తున్నామని, ప్రేమిస్తామనీ
నీతోనే, నీ వెనుకే ఉంటామనీ -

_______________________ ________

ఏనుగంత ముద్దులతో: this image is from a letter of Che Guevara. ఎక్కడ చదివానో జ్ఞాపకం లేదు. తెలుగులో వచ్చిన పుస్తకమే!