ఎవరైతే
నీ నీడను వెలిగించారో
ఎవరైతే
నీ నిదురని కాజేసారో
ఎవరైతే
నీ రాత్రిని రాజేసారో
ఎవరైతే
నీ పగటిని లిఖించారో
ఎవరైతే లేకుండా ఉండి
నిను మాయచేసారో
ఎవరైతే రహస్యంగా
నిను తాకి నవ్వుతో వెళ్ళారో
ఎవరైతే నువ్వు లేక
కనుపాపలలో నెత్తురు కొన మెరిసి
విలవిలలాడిపోయారో
ఎవరైతే నువ్వు కానరాక
ఒంటరి రాకాసి గదులలో
లుంగలు చుట్టుకుపోయి
దూరం కాలం ఒక్కటే
అని తెలుసుకున్నారో
ఎవరైతే తమ
నీడకు చితి అంటించుకున్నారో
ఎవరైతే
తమ నిదురను సమాధి చేసారో
ఎవరైతే తమ రాత్రిని
చిట్లిన గాజుపెంకు అంచున ఉంచారో
ఎవరైతే తమ పగటిని
శవపేటిక వలె ఆలంకరించారో
వాళ్లు నా వద్ద లేరిపుడు -
నీ వద్దేమైనా ఉన్నారా? వాళ్లు?
No comments:
Post a Comment