ఒక వేకువ ఝామున*

ఒక వేకువఝామున
ఆమె తనలోకి తాను ముడుచుకుపోయి పడుకుంటుంది

దేవతలు దు:ఖాన్ని ప్రశ్నించరు
హృదయాల్ని/ మనుషుల్ని రక్షించరు -
అందుకని ఆమె
మిగుల్చుకున్న మూడేళ్ళ కొడుకుని
పొదుపుకుని పడుకుంటుంది

దేవతలు దు:ఖాన్ని ఇస్తారు
హృదయాలపై హత్యాధ్వనులను మాత్రమే మిగుల్చుతారు

అందుకని ఆమె
నిమజ్జనపు రోజున
తన ఇంటికి తానే తాళం వేసుకుని
భయం భయంగా, తనలోకి కొడుకునీ
కొడుకులోకీ తననీ ఇముడ్చుకుని పడుకుంటుంది

ఇంటి ముందు నుంచి ఊరేగింపు వెళ్ళాలి
కుంకుమ చినుకులతో, నిమజ్జనపు ఉన్మాధపు నృత్యాలతో
వీధి వీధంతా జలదరించాలి - ఊరేగింపు-

ఉన్మాధపు ముఖాలు
నుదిటిపై పొడుగాటి ఎర్రటి అంగాలు
కింద జ్వలించే కనుల వృషణాలు
ఉన్మాధపు మృగాలు - అయ్యో, నిమ్మజనపు ఊరేగింపు
ఇంటి ముందు నుంచి వెళ్ళాలి

అందుకని ఆమె
తన ఇంటి తలుపులకి తానే తాళం వేసుకుని
భయంగా, తనలోకి కొడుకునీ
కొడుకులోకీ తనీ పొదుపుకుని పడుకుంటుంది-