beer, whiskey or vodka?

మధువనిలో ముగ్గురు
హితులు, సన్నిహితులు, స్నేహితులూ-

ముగ్గురూ
మూడు అమృత పాత్రలూ, విష భాండాగారాలు

ఏం తాగాలి ఇక ఈ పూటకి?
ఎవరు ఎవరిని తాగాలి ఇక ఈ సంచార రాత్రి వేళకి?
ఎవరు ఎవరిని కలవాలి ఇక
ఈ అనాత్మ చీకటి కాంతికి?

ఇది అంతా ఆదిమ సంగీతం
ఇది అంతా ఆదిమ విలాపం - పాపం
అంతటా ఒకటే సందేహం, సమదేహం
ఒక ఒక్క దేహం

నెలవంకతో
ఎండిపోయిన నాలికలతో, వేసవి గాలితో
బయట రాలే, నేలపై వాలే
వేపాకుల మృత కాలంలో

ఈ రహదారి పక్కగా వెలసిన
మరో లోకంలో, మరో స్వర్గంలో మరో నరకంలో
ఇక ఏం తాగాలీ పూటకి

beer, whisky or vodka?