రాత్రుళ్ళలో నిన్ను చూసే మెత్తని నయనాలు
ఈ దారిలోని గులకరాళ్ళు-
నీ అరచేతులలోకి అవి ఒదిగినప్పుడు
నీ హృదయంలో రెక్కలు
విదుల్చుకుంటాయి నల్లటి పావురాళ్ళు
చేతులపై రోమాలు జలదరించి
శిరోజాలు చిందరవందర అయ్యి
నీ పాదాలని చుట్టుకుని సాగుతాయి చల్లటి నదుల నీళ్ళు - చూడు
ఏ కళ్ళలోని చెమ్మో కలిగిన గూళ్ళు
ఈ నల్లని గులకరాళ్ళు
ఏ పసినవ్వులో తాకిన
పూలు ఈ గులకరాళ్ళు
ఆ నీలి సంద్రాల నిశ్శబ్ధం
ఆ ఇంద్రజాలపు లోకం ఈ గులకరాళ్ళు
ఏరుకువచ్చిన పసిపిల్లల కాలం
నీరెండ తాకిన
గులాబీల నీడల మోహం మైకం
ఈ గులకరాళ్ళు -
మొదటి ప్రేమలూ
మొదటి కౌగిళ్ళూ
యిక తిరిగి రాని, రాలేని వీడ్కోలులూ
తనువులూ తపనలూ ఈ గులకరాళ్ళు-
(యిక ఏం చేయగలవు వీటిని?)
ఏం చేయలేక యిక
రాళ్ళయిన కళ్ళతో
కళ్ళయిన రాళ్ళతో
రాళ్ళూ నిద్రపోతాయి
నీళ్ళ నీలి నిశ్శబ్ధంతో
నిలువెత్తు కన్నీళ్ళయిన నీ కళ్ళలో!
No comments:
Post a Comment