తల్లి పాలు

ఊరులు తిరిగిన దారులు
దారులను తనువులతో అద్దిన మనుషులు

ఎవరూ లేరిపుడు: చూడు
వొదిలివేసిన ఒక వేణువు, తిరిగి వెదురువనం కాలేక

మట్టి నీటి పెదాలపై ఊపిరి కాలేక
ఆదిమ నాదం కాలేక
ఎలా వడలిపోయిందో-

లిపి లేని ఎటువంటి
మహా నగరపు
మృత మృగలిపి ఇది!

నాకు వొద్దు
దాహం తీరని ఈ శీతల చదరపు గూళ్ళు-

వెళ్లి పోతాను
వెళ్ళేపోతాను

తొలి చినుకు చింది
పుడమికి మోకరిల్లిన
ఆ చిగురాకును
తిరిగి నాకు తెచ్చివ్వు-