ఎలా?

ఇన్ని ఏళ్ళ తరువాత తనని తిరిగి మళ్ళా చూడటం-

కంపించే చేతివేళ్ళతో, తన ముఖాన్ని తాకితే 

     నా చేతివేళ్ళ చివర్లన్నీ, తన కన్నీళ్ళ
     నెత్తురు అంటుకుని 

     చిట్లిపోయాయి

భగవంతుడా! చుట్టుకుంటున్న చీకటీ
     కన్నీళ్ళ పర్యంతం అయ్యే
     ఈ వేళల్లో

సన్నటి గాలి కూడా గొంతు చుట్టూ బిగుసుకుని

     ఊపిరాడనివ్వకుండా నులుమే
     ఇటువంటి కాలాలలో 

ఒక ముఖం మరొక ముఖంపై
     వడలిపోయి అలా
     నిస్సహాయంగా
     రాలి

పోయే వేళల్లో 

భగవంతుడా -

ఇక ఈ రాత్రి ఎలా తెల్లవారడం?
     ఎలా బ్రతికి
     ఉండటం?