ఎన్నడైనా?

ఇక్కడ నువ్వుంటే బావుండేది- (నిజంగానే, ఆ రిక్త అరచేతుల్లోనే)

వేళ్ళతో తాకితే కదిలే చీకటి. ఇదొక సరస్సు కూడానూ-

శరీరాన్ని నావను చేసి వొదిలితే, మరి 

సన్నగా వీచిన గాలికీ, ఆ కాంతికీ ఇక 

ఒక్కసారిగా ప్రాణం వచ్చిసాగిపోతుంది 

రాత్రి అలలపై ఈ కాగితపు నావ, తీరం లేని లోతుల్లోకీ, ఒక విస్మృతి 

కాలంలోకీ, నువ్వు లేని లోకాలలోకీ- 

అయినా సరే, మరి ఇక్కడ నువ్వుంటే బావుండేది (నిజంగానే)

ఈ చీకటి నీళ్ళలోకి తొంగి చూసి, వాటిని మంచినీళ్ళ వలే మార్చే  

నీ ప్రతిబింబాన్నిఈ అరచేతులతో అందుకుని

కొంత నా దప్పిక తీర్చుకునేందుకూ, 

ఈ శోక వదనాన్ని కడుక్కుని కొంత 

తెరపి పడేందుకూ, ఆపై నిదురించేందుకూ-

అది సరే కానీ, రాత్రిపూట గోడలపై రెపరెపలాడే నీడలను చూస్తూ 

కూర్చున్నావా ఒక్కడివే ఎన్నడైనా?