రాయాలనిపించనప్పుడు (or how to write a bad poem 2.)

వెళ్ళిపోయేదేమీ లేదు
ఉంచుకునేదేమీ లేదు

సరే. రాయాలనిపించనప్పుడు
అలా నడువ్ కాసేపు

కొమ్మల మధ్య విచ్చుకున్న
ఎర్రటి పూలు
ఎర్రటి పూలలో చిక్కుకున్న
నీలి ఆకాశం
నీలి ఆకాశంలో పోగవుతున్న
వాన లోకం

పాదాల కింద మట్టిని పాదాలతో
తాకు. పరవాలేదు

పదాలను ఇసుక గూళ్ళలాంటి
పదాలను పిల్లలకి ఇవ్వు

ప్రతీసారీ కవితాత్మకంగా రాయక
మాట్లాడక ఈసారి కొంత

అర్థం అయ్యేటట్టు నలుగురితో
మాట్లాడు. తిరుగు.

కాసేపు నవ్వు. కాసేపు నీతో
గడుపు. పరవాలేదు

ఈ సరళత్వంలో
ఒక తెమ్మర దాగి ఉంది
అది నిన్ను రక్షిస్తుంది

పరవాలేదు
పోయేదేమీ లేదు
వచ్చేదేమీ లేదు

కంగారుపడకు
భీతి చెందకు= వర్షం వచ్చే

వేళయ్యింది. వెళ్లి కిటికీ
తెరువు. నువ్

రాయాలనుకున్నవన్నీ

రాలబోతున్నాయ్.
వేచి చూడు.