నీ నిరీక్షణలో మునిగిన
నా కళ్ళు పాలరాతి రాళ్ళు
రాలే చినుకుల చీకటి తడి
వాటిని కదపలేవు
శిలవంటి గాలి శిలువ వంటి
రాత్రి= నువ్వు ఎక్కడ
శిధిలమయ్యావో తెలియదు:
ఒళ్ళు పులిచిపోయింది
ఎడారిగా నాలిక
మారింది
నావికుడెక్కడో తెలియదు
నక్షత్రాలు హృదయాన్ని
వదలవు
నీడలు కమ్మిన దారిలో
నిర్ధయగా ఆమెతో నేను
ఇద్దరికీ తేడా లేదు
ఇద్దరికీ గూడు లేదు
ఇద్దరికీ తెలియదు
శరీరాన్ని అమ్ముకునే
తనకూ
మిత్రుడిని నమ్ముకున్న
నాకూ
ఇక ఈ రాత్రి అంతం
అవుతుందో లేదో
చివరాఖరకు చివరి
రాత్రికీ తెలియదు
No comments:
Post a Comment