ఏమౌతుందో ఈ పూట

ఏమౌతుందో ఇక ఈ పూట
మిత్రుల వద్దకు వెళ్ళాలి=

తొలి వేసవి గాలికి
నేల రాలుతున్నాయి పూలు
ఆకులతో, పిల్లల కనులలో=

అరచేతుల మధ్య
పొదివి పుచ్చుకున్న పూలు
నువ్వు నీ హృదయంలో
దాచుకుని
పెంచుకున్న పూవులు
నీ మిత్రులు

రాలిపోతున్నారు
వేదనతో,పిగిలిపోతున్నారు
ఈ లోకపు వాదనలతో=

తొలి వేసవి గాలిలో వాళ్ళు
ఆహ్వానిస్తున్నారు నిన్ను
ఒక పూలతోటలోకి

మధుపాత్రలతో
మరవలేని పాత్రలతో
దిగులుతో

ప్రేమతో
సంతోషంతో
ద్వేషంతో

ఒక మంచుపూల తోటలోకి
సమ్మోహితుడిని
చేస్తున్నారు నిన్ను=

వెళ్ళాలి
ఆలస్యం చేయకుండా
వెళ్ళాలి
తనువంతా గాయమైనా
వెళ్ళే తీరాలి
మళ్ళా తిరిగి రాకున్నా

ఏమౌతుందో ఇక ఈ పూట
ఏమౌతుందో ఇక ఈ వేట=