ఈ రాత్రి
ఆమె దేహం అలసిపోయింది
నిన్నటి లాంటి ఈ రాత్రి
ఈ రాత్రి లాంటి మొన్నటి రాత్రి=
మూడు రోజులుగా
ఆమె దేహం అలసిపోయి
వెళ్ళు వెలుపలికి వచ్చి
వొరిగిపోయిన చెట్టులా
ఆమె మంచంపైకి వాలిపోయింది
జ్వరం. దుఃఖపూరితమైన
సాలేపురుగేదో గూడు కట్టుకుంటున్నట్టు
మోకాళ్ళ మధ్య నొప్పి.
"మోకాళ్ళ మధ్యనుంచి నలువైపులా
నరాలు వీడిపోతున్నట్టు
భరించలేని నొప్పిరా నాన్నా." నా తల్లి
నొప్పిని ఉగ్గపట్టుకుంటుంది.
ఆమె పక్కగా కూర్చున్నాను
ఎడారిలో, వేసవిలో నగ్నంగా నుంచున్నట్టు=
శరీరం: ఆమె శరీరం
నీటిలా ఆవిరైపోతుందా?
ఆమె నిశ్శబ్దంగా పడుకుంది. నిశ్శబ్దం
మహా శబ్దమైన మృదువైన భాష.
ఆమె పలుమార్లు సంబాషించింది, నాతోటి
అటువంటి మహా నిశ్శబ్ద భాషలో
ఇప్పటిలాంటి మునుపటి రోజులలో=
ఆమె నుదిటిపై అద్రుశ్య0గా కదులాడుతున్న
ఒక పొద్దుతిరుగుడు పూవు
ఆమే ఒక పూవు. సూర్యరశ్మి వర్షంలా
కురుస్తున్న దృశ్యం కూడా ఆమె.
ఆమె ఒక యోధురాలు=
రాత్రిలో బయటనుంచి ఒక పిల్లి అరుస్తోంది
ఆమె కోసం
గది బయట అది అసహనంగా తిరుగుతున్న
పదాల సవ్వడి.
నా హృదయంలో కూడా అసహనంగా
ఒక పిల్లి కదులుతుంది
ఆమె కోసం, ఆమె కోలుకుని ఇచ్చే పాల కోసం
పాలలాంటి ప్రేమపూరితమైన జీవితం కోసం=
Pathetic picturisation of a great poetic environment, suffer. You have imbibed in to the situation.
ReplyDelete