(పోనీ)

తలను వంచి, నింగి నుంచి
నేలకు రాలిపోతున్న
ఆ తెల్లటి మొగ్గను ఎపుడైనా
చూసారా మీరు? (పోనీ)

భూమి నుంచి, నింగిలోకి
పొగలవుతూ
కనుమరుగవుతున్న
ఆ వేసవి నదిని
ఎపుడైనా చూసారా మీరు? (పోనీ)

రహదారిలో తప్పిపోయి, ఇంటికి
దారి మరచిపోయి
తల్లికై గుక్కపట్టి ఏడ్చి ఏడ్చి
ఓ మూలకు ఒదిగి ముడుచుకున్న
ఆ నాలుగు ఏళ్ల పాపను
ఎపుడైనా చూసారా మీరు? (పోనీ)

మిమ్మల్ని హత్తుకుని, భీతితో
చుట్టుకుపోయి
మీ హృదయంలోకి దాగిపోయే
ఆ హృదయంలోకి
ఎపుడైనా నడిచి వెళ్ళారా మీరు? (పోనీ)

ఎదురు చూసే కళ్ళలో కాటుకగా
ఎపుడైనా మారారా మీరు?
కాటుక వెనుకగా ఉండే రహస్య
ప్రపంచాలలో ఎపుడైనా
నిండు చందమామ అయ్యారా మీరు?
ఆ అరచేతుల్ని పొదివి పుచ్చుకుని
నీకు నేను ఉన్నాను
అని ఎపుడైనా చెప్పారా మీరు?
ఆ వదనంలో ఒక పూల తోటను
ఎపుడైనా నాటారా మీరు?
ముళ్ళ బాటలో, ఆ పాదాల కింద
మెత్తటి పచ్చికగా
ఎపుడైనా మారారా మీరు? (పోనీ)

ఎపుడైనా, ఎక్కడైనా
మీరు మీరుగా
మీకు మీకుగా
ఎపుడైనా, ఎక్కడైనా
ఉన్నారా మీరు?