ఏదీ రాయాలనిపించనప్పుడు

ఏదీ రాయాలనిపించనప్పుడు
ఏమీ రాయకపోవటమే మంచిది

ఊరికినే అలా కూర్చో
రాయటం తప్ప ఏదైనా చేయ్

నీ పిల్లలు విసిరివేసిన బొమ్మలనూ
చించి వెదజల్లిన కాగితాలనూ
ఒక దరికి చేర్చి, గదంతా శుబ్రంగా
తడి గుడ్డతో తుడువు ((లేదా))

ఇంటిపైన గుమికూడిన నీడల కింద
కదులాడే పూల మొక్కలతో
కాసేపు సంభాషించు ((లేదా))

ఈ పూటకు కావాల్సిన కూరగాయలను
కడిగి, తురుముతూ కోస్తూ
నీ భార్యతో కాస్త మనసు విప్పి మాట్లాడు ((లేదా))

దగ్గరిగా ఉన్నా, దరి చేరలేని
నిను కని, తమని తాము కోల్పోయి
ముసలి వాళ్ళుగా మారుతున్న
నీ తల్లినీ, తండ్రినీ
కాస్తంత ఓరిమితో పలుకరించు ((లేదా))

దగ్గరిగా ఉండీ, దగ్గర కాలేని
నిను విన్న, నిను కాంచిన, ఈ లోకంలో
దారితప్పి తిరుగాడుతున్న
నీ స్నేహితులు జీవించి ఉన్నారో, ఎక్కడైనా
మరణించారో కనుక్కో ((లేదా))

కాస్తంత ఎండనీ, కాస్తంత గాలినీ
ఆరుబయట తిరుగాడుతున్న తూనిగలనీ
హృదయంలోకి తీసుకో
కనులు మూసుకుని నిన్ను నువ్వు
కాసేపు స్వప్నించుకో . ఎందుకంటే

ఏదీ రాయాలనిపించనప్పుడు
ఏమీ రాయకపోవటమే మంచిది