ఎలా?

నీకేమైనా రాద్దామని ఉంటుంది. కనీసం, ఇలా ఈ బల్లపై వడలిపోయిన
లేత పసుపూ, లేతెరుపూ కలసిన
గులాబీ మొగ్గల వంటి పదాలనైనా-

కిటికీలోంచి అప్పుడప్పుడూ తొంగి చూస్తాయి పిచ్చుకలు. అంతలోనే
ఎగిరిపోయే వాటి రెక్కల సవ్వడి-
గాలి తాకితే ఊగే నీడలూ, పైనేమో
బరువుగా సాగిపోయే మబ్బులూ-

నిజమే, ఇవ్వాలని అనుకుంటాను
కనీసం చినుకులనైనా, చీకటినైనా
మరి అదే సాయంత్రం, అదే రాత్రిలో
నీకైనా, నాకైనా: కానీ, నానీ, మరి
తెలుసా నీకు ఏమైనా
ఇలా, వడలి/పోయిన

తెలుపూ, లేతెరుపూ కలగలసిన, సాయంత్రాలలో ధూళికి రాలిపోయిన
తెల్ల గులాబీ మొగ్గల వంటి, నీ కళ్ళనూ
నా కళ్ళని తిరిగి బ్రతికించుకోవడమెలాగో?