ఇది?

తెరుచుకుని ఉంది ఒక తలుపు
నువ్వు అవతల ఉన్నావో, ఇవతల ఉన్నావో నీకే తెలియదు

తను వస్తుందా రాదా, తను వచ్చి
నిన్ను వెలుపలకి వేస్తుందా, లేక తన తనువు ఇచ్చి నిన్ను

లోపలకి పిలుస్తుందా అని కూడా తెలియదు నీకు:
సమస్య అంతా లోపలెవరో, బయటెవరో అని. తెలీనితనమల్లా తను

ఎవరో నువ్వు ఎవరో అని, కిలకిలా నవ్వే పిల్లలు నిన్నెలా చూస్తారోనని:

రాత్రి గోడ మీద పావురాళ్ళు, ఆ గోడల రాత్రుల్ల మీద సాలెగూళ్ళు
వాటి మీద వాటితో పాకుతూ ఏవో అల్లుతూ కూర్చుంటావే నువ్వు

అప్పుడు అక్కడ ఏమనిపిస్తుంది నీకు? అరచేతిలో బాకుని దాచుకుని
నిద్రమాత్రలతో ఎవరో ఊపిరి ఉరికై నువ్వలా ఎదురు చూస్తున్నప్పుడు?

తెరిచి ఉన్న తలుపులతో ప్రేమ గీతాలు రాయకురా అని అతనే చెప్పాడు
తెరిచి ఉన్న హృదయాలతో స్త్రీలని నమ్మకురా అని అతనే రాసాడు

తెరువక, మూయక లోపలి రాక, బయటకు పోక
పూలపాత్రల్లో సూర్యరస్మిని తనకి దాచకని ఉంచకని నీకు చెప్పక చెప్పింది ఎవరు?

ఇక ఒక రాయి శరీరంలోంచి ఒక వింత విషంతో విచ్చుకుని
సీతాకోకచిలుక రెక్కలతో పురి విప్పి ఆడటం మొదలయ్యింది ఇప్పుడే: ఇక రాత్రీ లేదు

నువ్వు తలదాచుకునే చోటూ లేదు. వస్తావా నువ్వు
ఈ ముగ్ధ మనోహర నరబలి స్వప్న వీక్షణానికి, అతడికి ముందూ తరువాతా

తనకి బయటా తన లోపలా ఏమీ కాని తనంతో, ఏమీలేనితనంతో ఒక్కసారి?