ఏమని అందాం దీనిని?

తిరిగారు ఇరువురూ
దేశద్రిమ్మరీ దేహద్రిమ్మరీ ఆశువులను అమ్ముకునే అనేక కాలాలలో అనేక రాజ్యాలలో

వెన్నెల కళ్ళలో ఒకరూ వేసవి బాహువుల్లో మరొకరూ

చిట్లిన ఆ మంచు ముఖంతో ఒకరూ
ముఖం లేని ప్రదేశాలలో మరొకరూ

తిరిగారు ఇరువురూ: దేశం లేని దేహంతో ఒకరూ
దేహం లేని దేశంతో మరొకరూ అంతం లేని లోకాలలో ఎవరూ లేని రాని కాలాలలో:

= నిలువునా చీలిన ఆరడుగుల అద్దపుపేటికలో
ఇరువైపులా చెరో వైపునా చీలి
తనని కావలించుకుని పునర్జన్మించినది ఎవరు?=

(దేహభక్తుడా దేశభక్తుడా అని ఇక
నేను నిన్ను ఎన్నటికీ అడగను)

*ఉన్నంతకాలం, తను ఉన్నంతకాలం
తన తనువు ఉన్నంతకాలం, నీళ్ళల్లో కళ్ళల్లో కలలపూల జగత్తులో
నిదురపో నిశ్చింతగా: ఇక నిన్ను కదిలించేదెవరు?*