ఆ ఒక్క చోటు

ఇరువైపులా ఇద్దరు. మధ్యలో, మధ్యగా అర్ధాంతరంగా సమాంతరంగా
ఇరువురినీ విడదీస్తూ ఆ ఇరువైపులా ఒక్కరే

బల్లపై నిలిచిన పూలపాత్ర. నీటికి చెమ్మగిల్లిన రెమ్మలు
ఎవరివైపు వొంగాలో తెలియక వడలిపోతూ
తలలు వొంచి ప్రార్ధిస్తాయి, సన్నగిల్లుతున్న

ఉదయపు తోటల పరిమళాన్ని సాయంత్రానికి
వొదిలివేస్తాయి, రాత్రికి బలి ఇస్తాయి: ఏమో

ఇక ఒక జాబిలి గదిలోకి పలకలు పలకలుగా రాలిపడవచ్చు
ఒక వర్షపు తెర పదునైన గోళ్ళతో ఆ వదనాలని చీల్చవచ్చు
ఒక అన్నం ముద్ద అరచేతిలో అలా ఎండిపోతూ మిగలవచ్చు

ఒక మంచం, ఒక దుప్పటి
ఒక దిండూ, ఒక దేహం స్వ
దేహం కోసమే దాహంతో పిడచకట్టుకుపోయి, పాడె కట్టుకుపోయి
ఖననానికై, దహనానికై ఎదురుచూస్తుండవచ్చు

ఆ రెండు చేతులూ, ఆ రెండు కాళ్ళూ
ఆ రెండు కళ్ళూ, ఆ రెండు పెదాలూ
మరో రెండుకై, అంధులై అద్దాల చీకటిలో తిరుగాడుతుండవచ్చు
ఎప్పటిలోకో, ఎవరికోసమో, ఎందులోకో రాలిపోతుండవచ్చు రాలి
పిగిలిపోయి ఏమీ కాకుండా ఎవరికీ లేకుండా మిగిలిపోతుండవచ్చు

ఇరువైపులా ఇద్దరు. ఇరువైపులా ఇద్దరిలో ఒక్కరు. మధ్యలో
ఒక్కరిని ఇరువురిని చేస్తూ, ఇరువురిని ఆ ఇద్దరిగా విడదీస్తూ

రెండుగా, అనేకంగా చీలిపోయిన
చెమ్మగిల్లుతూ వడలిపోతున్న వొణికిపోతున్న
ఆ ఒక్క సప్తరంగుల శ్వేత పుష్పమే
ఆ ఒక్క సప్తరంగుల నీలి తనువే -

కుంచించుకు పోతున్న ఆ ప్రమిదె కాంతిలో
వెడలిపోతున్న ఆ రెండు శరీరాల ఒక్క నీడే!

ఇంతకూ నువ్వు వచ్చావా ఎప్పుడైనా ఎందుకైనా
ఆ ఇద్దరు ఎదురుచూస్తున్న ఆ ఒక్క చోటకి?