మూర్ఖుడు

కొంత తక్కువ, కొంత ఎక్కువ: అలా అని తన ముందూ కాదు
అలా అని తన తరువాతా కాదు

అలా అని ఎదిగినంత కాదు. అలా అని ఎదగలేకా కాదు.
అలా అని తాకాననీ కాదు, అలా అని తాకలేకా కాదు.
ఏంటంటే ఎదిగిన హృదయం ఏదీ లేదిక్కడ. అందుకని

అందుకనే అతడి శరీరం భస్మీపటలం అయ్యింది ఇక్కడ. అందుకనే

అతడి కనులు హిమసుమాలు అయ్యాయి ఇక్కడ. అందుకనే
నీ చూపుడు వేలిని అతడి అరచేయి వొదిలివేసింది ఇక్కడ
అందుకనే నీ చూపు చిహ్నంగా అతడికి మిగిలింది ఇక్కడ

అలా అని ఎదిగానని కాదు. అలా అని ఎదగలేకా కాదు. అలా అని
నీ ముందనీ కాదు, అలా అని నీ తరువాతా అని కాదు.

నిన్ను ఆపలేక, నిన్ను ఓపలేక, నిన్ను రాయలేక
ధరిత్రిన కుంగి, తనని తాను దహించుకుని
అనంతం నుంచి అనంతం దాక నుదిటిన నీ ముద్రతో
నిదురించినది అతడేనా?