యిద్దరు స్నేహితులు

ఆ నీలి నీళ్ళల్లో నిలబడ్డారు ఆ యిద్దరు స్నేహితులు

రాత్రికి ఇటువైపుగా ఒకరు, రాత్రికి అటువైపుగా మరొకరు
కళ్ళల్లో ధూళితో, దూరంతో ఇక తిరిగి ఎన్నటికీ తాకలేని
విడిపోయ్యే అరచేతులయ్యిన ఆ యిద్దరు-

ఇవ్వడానికీ ఏమీలేవు ఇద్దరికీ, ఇటువైపుగా కానీ అటువైపుగా కానీ:
అందుకే ఇద్దరి మధ్యలో పూసిన నిశ్శబ్ధం పూవులోంచి
చెరో రెమ్మను తెంపుకుని ఇరువురిగా వెళ్ళిపోయారు ఇరువురు అందరిలోకీ-

ఇక ఆ రాత్రంతా రెండు రెమ్మలని కోల్పోయిన ఆ రోజా పూవు ఒక్కటే
వానలో గాలిలో విలవిలలాడిపోయింది రాత్రిలో రాత్రిగా మిగిలిపోయింది రాలిపోయింది

ఇంతకూ ఇరువురినీ ఇరువురిగా మార్చిన తను ఎక్కడ? తన తనువు ఎక్కడ?