ఏడువు

ఏడువు నాయనా ఏడువు
నన్ను పట్టుకునో ఒక స్త్రీని పట్టుకునో
ఒక రాతిని పట్టుకునో
ఒక రాత్రిని పట్టుకునో
ఏడువు నాయనా ఏడువు

బద్దలు కొట్టుకో నుదుటిని
విరుచుకో హృదయాన్ని
శపించు జాలిలేని జనాన్ని

నిర్మించకు
నివారించకు
వివరించకు

రహదారులలోనో
మధుశాలలలోనో
మతిమరుపు లేని
పూలతో ముళ్ళతో
పుణ్య పాపాలతో
ప్రేమించే ద్వేషాలతో

నీ అవసరం లేని
స్నేహితులకై
నిన్ను బంధించే
నినదించే భార్యకై
నువ్వు కాలేని
నీ బిడ్డకై

ఏడువు నాయనా ఏడువు
కడుపారా కసిదీరా ఏడువు

లోకం కరిగిపోవాలి
కాలం రాలిపోవాలి
ఈ జన్మ ఋణం ఏదో
ఇప్పుడే తీరిపోవాలి
ఇప్పుడే చచ్చిపోవాలి

చదరపు గదుల్లో
ఇమడని జీవితం
నేల లేని స్థలానికి
నీవు లేని స్థలానికి
రూపాయి మూల్యం
అంతా దరిద్రం

ఏడువు నాయనా ఏడువు
ఇంతకు మించీ
ఇంతకు మినహా
నీకూ నాకూ

మరో మార్గం లేదు
మరో మోక్షం లేదు