అక్కడ ఉంటాయి అవి
అప్పుడప్పుడు నిన్ను
నీ చూపులతో చూస్తో:
జతలుగా మిగిలిన జాతులుగా
చెట్లపై చెదిరిన ఇళ్ళ కప్పులపై
జారుతో జాగ్రత్తగా దిగుతో
తలకిందులుగా వేలాడుతో
తలకిందులైన లోకానికి తమ
పదును దంతాలను చూపిస్తో
ఉంటాయి అవి అక్కడ
వొంటరిగా విచిత్రంగా
ఒక మహా దిగులుతో తపనతో:
ఎక్కడనుంచి వచ్చాయవి?
ఎలా వచ్చాయవి?
ఎలా బ్రతుకతాయి అవి ఈ
నిర్ధయ మానవ లోకంలో?
ఏమీ తోచక, ఏమీ చేయలేక
సంచార జాతులని మిగల్చని
ఈ సదా యంత్ర మోహిత
వస్తు వికసిత కరకు కాలంలో
నువ్వు నీ తలను బరుక్కుంటూ
కళ్ళు చికిలించుకుని
నువ్వు కోతివి ఎందుకు కాలేదో
కనీసం తోక అయినా ఎందుకు
లేదో అని యోచించుకుంటో
ఎర్రని ముడ్లని చూపించిన
ఆ కోతులను స్మరించుకుంటో
ఆ ఇంటికి నీడల ముగ్గులను వేసే
చీకటి కమ్ముకున్న
తన ఇంటికి వెళ్ళిపోతావు=
No comments:
Post a Comment