ఎవరక్కడ

అద్దంలోకి దూకాను: కొంత విసుగుతో

అదొక ముఖమైతే అరచేతులలోకి తీసుకుందును
అదొక స్త్రీ అయితే కౌగలించుకుందును
అదొక స్నేహితుడైతే మనస్సు విప్పి మాట్లాడి ఉందును
అదొక శత్రువైతే నిలువెల్లా ప్రేమించి
అపరమితంగా ద్వేషించి ఉందును
అదొక పాపైతే తనతో పరిగెత్తి ఆడుకుని ఉందును

కాదది ఒక జీవం కాదది ఒక మృగం
కాదు కాదది ఒక విహంగం: నింగీ కాదు నిప్పూ కాదు
నీరూ కాదు నేలా కాదు
పచ్చని చెట్టూ కాదు ఎర్రని పూవ్వూ కాదు
వీచే గాలీ కాదు రాలిపోయే ఆకూ కాదు

నల్లని నీడలు నల్లగా నల్లటి నీడలలోకి
తీసుకువెళ్ళే మాయ మంత్ర దర్పణం

ఎవరక్కడ: ఈ అద్దాన్నీ అద్దంలో అద్దంగా మారిన
నా ముఖాన్నీ మరిక చూడలేను

తీసుకు వెళ్ళండి నన్ను ఇక్కడ నుండి.