అప/శకునం

ఇదేదీ మంచిది కాదు. వొదులు- అంది తను

నిన్ను నిలువెల్లా తాకిన నీళ్ళు
చిట్లిన అద్దమై పాలిన వదనమై
మహా అజగరమై చుట్టుకోవటం

అంత మంచిది కాదు- అంది తను.

పోవు పొమ్మననూ లేవు. ఆ ముఖాన్ని.
నిన్ను హత్య చేసిన అదే ముఖాన్ని
నువ్వు చంపాలేవు దానిని నువ్వు
దాచిపెట్టనూ లేవు. పాతిపెట్టనూ లేవు-అంది తను.

కొంతకాలం నిశ్శబ్ధం అవ్వటమే మంచిది ఇక
కొంతకాలం రాయకపోవడమే మంచిది ఇక :

తెలుసుగా నీకు ఇది, ఇదే నువ్వు చూసేదే
మహానిర్ధయ పిసినారి లోకం- అన్నాను నేను.

ప్రేమించడానికేం, ఉన్నారు లక్షమంది
ప్రేరమించడానికే లేరు ఎవరూ - అన్నారు
ఆ ఇద్దరిలో ఎవరో:

ఎవరు అన్నారో, ఇద్దరిలో ఎవరు ఎవరో
తెలీలేదు ఇప్పటికీ ఇద్దరికీ!