ఫిబ్రవరి 28, 2013 సాయంత్రం

ఫిబ్రవరి 28న సాయంత్రం నాడు, ఇక ఈ దినాన్నీ ఈ మాసాన్నీ
     ఎలా ముగించాలా అని మల్ల గుల్లాలు పడుతూ ఉంటే, ఫిరోజ్ వచ్చి
తన అరచేతుల్లో అల్లుకున్న గూటిలో

అపురూపంగా ముడుచుకుని పడుకుని ఉన్న, లేత రంగుల
     శాంతి తళుకుల ఆ అందమైన గబ్బిల్లాన్ని చూపిస్తో అంటాడు:
తెలుసా నీకు? ఎలాంటి వాసనో దీనిది?

పచ్చి ఆపిల్ పళ్ళ వనాల వాసన, కమ్మనైన రుచి
     వణికే పెదాలు, మరి లేత ఎరుపు కనులూ తనవి. ఒక్కసారి
ముద్దిడి చూడు. మరిక వదలవు దానిని

దా, దా. మన ముగ్గురమూ కలిసి నిదుర లేచి అలా
     రాత్రి లోకాలలోకి వెళ్లి, నక్షత్రాలని వెదజల్లి వచ్చే సమయమయ్యింది.
 తెలుసు కదా నీకు, ఈ Smirnoff, మరి నా ఫరీదా

దొంగ నాటకాలతో, దొంగ నీతులతో పిరికి ప్రియుళ్ళకై వేచి చూసే
     ఓపిక లేని వాళ్ళనీ. రా మరి. ఆలస్యం చెయకు. స్నేహితుల తోడు లేక
ఈ అమృతాన్ని విషాన్ని చేయకు. రా, రా. ఆలస్యం చేయకు

నీ హృదయాన్నీ, నోటినీ శుభ్రంగా కడుక్కుని రా " అని అంటే

ఈ పిబ్రవరి 28, 2013 సాయంత్రం ఈ రాత్రీ ఈ దినం ఎలా ముగియబోతుందో
     నాకు అయితే అర్థం అయ్యింది . మరి మీకూ?