నలుపు

ఈ వేళ ఒక నలుపు షర్టుతో, ఒక నలుపు పాంటుతో
నల్లని సూర్యుని కింద, నల్లని పదాలతో నేను - ఆహ్.

ఏమిటంటావా ఇది?
ఏమీ లేదు. నిట్ట నిలువునా చీలిన ఛాతిలోకి ఒక బిందువు
రాలిపడి, ఇక అంతా

వలయాల ప్రకంపన.

ఏమిటా అని శరీరంలోకి తొంగి చూడకు, చివరికి
ఈ నెత్తురు చుక్కలూ
ఓపలేని నల్లటి సెగలై

దహించుకుపోయి, ఎగసిపోయే బూడిద రేణువులైనాయి:

(-ఇంతకూ
నువ్వు అనుకుంటున్న వాళ్ళు, ఎవరూ లేరిక్కడ
శతాభ్ధాల కరుణ ముద్రికతో-)

ఇక ఆపై ఏమౌతుందో ఎవరికీ తెలుసు?