విన్నపం

గుండెకు గట్టిగా కరచుకుపోయి,
'వెళ్ళకు' అని అన్నావు
నువ్వు; బయట, గాలికి ఆకులు
కొట్టుకుపోయే సవ్వడి,

మబ్బు పట్టింది. కొంచెం తడిగా
కొంచెం జిగటగా, ఇంకా
అటూ ఇటూ చూస్తో, రోడ్డు దాటే
ఒక కుక్కపిల్లై పోయింది

హృదయం; మరి ఏవో కాగితాలు
కొట్టుకు పోతున్నాయి;
దుమ్ము రేగి, కళ్ళు చికిలించినా
ఏమీ కనపడదు; లోన!
***
గుండెకు గట్టిగా కరచుకుపోయి,
'వెళ్ళకు' అని అన్నావు
నువ్వు; నెమ్మదిగా, ఒక్కో వేలూ
విడదీసి వొదిలివేస్తే,

వానలో కూలిపోయిందీ రాత్రి!