బహుశా,

బహుశా, కూర్చునే ఉండవచ్చు నువ్వు,   
లేక నిలబడో; వొంటరి మేడపైనో
లేక లోయల వంటి హృదయపు గదులలోనో -

"దీపాలు వెలిగే కళ్ళు నీవి" అని అన్నాను 
ఓసారి నేను, నీతో; తెలుసు నాకు
బహుశా అవిప్పుడు ఎంతో మండే రాత్రుళ్ళు - 

ఇంకా, చాలానే చెప్పి ఉన్నాను; చినుకు 
చిందిన పూవువనీ, ఊయల వలే 
ఊగే గాలివనీ, కుదురసలే లేని ఉడతవనీ,

చీకట్లలో పనస ఆకుల మధ్య, సగం సగం
కనిపించే చంద్రబింబమనీ, మరి  
నీ సువాసనతో అదీ రాత్రిని వణికిస్తుందనీ!
***
బహుశా, పడుకునే ఉండవచ్చు నువ్వు,
లేక అలా మెలకువగానో; వేలితో 
గోడలపై నీడలంచులని ఎంతో దీక్షగా గీస్తో -

మరి, దీపాలు ఆరాక, గాలి ఆగాక, వాన 
వెలసి వణికిన రాత్రి నిద్దురోయాక, 
ఊయల్లో కనబడని బిడ్డని, చెక్కుకుపోయిన  

గుండెతో, వెదికేదెవరో తెలుసునా నీకు?