ఎక్కడ

అమ్మ పుట్టిన రోజు; మరి మబ్బులు పట్టి
గాలి వీస్తో బయట; దుమ్ము -
ఆవరణలో రాలి, దొర్లుతో వేపాకులు

ఇంటి వెనుక, తీగకు రెపరెపలాడుతో ఒక
ఊదా రంగు చీర; పాతదే,
ఇప్పుడు ఇల్లు తుడిచేందుకు వాడేదే;

( మరి అది అమ్మదే, రెండుగా చిరిగి ) -

ఒక జామచెట్టు ఉండేది అక్కడ; ఎన్నెన్నో
పళ్ళను ఇచ్చిన చెట్టు; ఇక
ఇప్పుడు, అక్కడంతా కరకు బండలు

పరచిన నేల; ( పగిలిన అరిపాదాలై ) -

ఎన్నో వెళ్ళిపోయాయి; ఎంతో ఏపుగా సాగి
అల్లుకున్న ఓ బీరతీగా, ఊగే
మల్లెపందిరీ, వెన్నెల్లో వొణికిన రాత్రీ ...

ఎన్నో వెళ్ళిపోయాయి; ఋతువులై కొన్ని
అశ్రువుల్లో మునిగిపోయి కొన్ని,
చీరేయబడిన పిల్లిపిల్లలై మరికొన్నీ ...
***
అమ్మ పుట్టిన రోజు ఇవాళ; బయట, మరి
మబ్బులు పట్టి, హోరున
గాలి; ఇల్లంతా ఖాళీ. కళ్ళల్లో దుమ్ము -

మరి, ఇక్కడ ఉండాల్సిన అమ్మ ఎక్కడ?