నీ నొప్పి

నీ నొప్పి తెలుస్తోంది నాకు; రొట్టెలకి
పిండి వొత్తుతూ అమ్మ,
కళ్ళని ఎందుకో తుడుచుకున్నట్టు -

రాత్రి పన్నెండయ్యిందా, ఇప్పుడు?
బయట, ముసురులో
వీధి దీపాలు; తడచి వణికే కాంతిలో -

బాల్కనీలో ఓ పూలకుండీ పగిలింది
వేర్లు వెలుపలికి వచ్చి,
మట్టి ధారగా కారి, చిత్తడి అంతానూ -

అవును: హృదయం కూడా; చెదిరీ
ఎందుకో బెదిరీ, కాలి
బొబ్బలు ఎక్కిన చేతివేలి చివరైతే,
***
నీ నొప్పి తెలుస్తోంది నాకు; ఎంతో
ఆలస్యంగా పడుకున్న
అమ్మ, నిదురలో వొళ్ళు నొప్పులకి,

అట్లా ఉలిక్కిపడుతో మూలిగనట్టు!