కొంచెం

"కొంచెం ఇవ్వు" అని చిన్నగా చేతులు
చాపుతారు ఎవరో,

అప్పుడు మరి నీ అరచేతులన్నీ ఖాళీ;
లోపలా ఏమీ ఉండదు,
ఎండిపోయిన సరస్సై హృదయం,
భూమీ; బీటలు వారి,

ఏవో రాళ్ళూ, ఇనుప తీగలూ, బహుశా
ఎవరికో ఇద్దామని దాచి
చివరికి చించివేసిన ప్రేమలేఖలూ,
విరిచేసిన బొమ్మలూ ...
***
"కొంచెం ఇవ్వు, నాక్కూడా"ని, చేతులు
చాపుతారు ఎవరో,
నీళ్ళ వంటి గొంతుకతో; నీతో -
***
బయట, తడిచి రాత్రి: మెరుస్తో, ఊగే
ఆకులు. నిద్రకు తూగే
కళ్ళైన పూవులు. అలసి, నిట్టూర్పై
ఆగిన శరీరం, చీకటీ!

ప్చ్; ఏమీ లేదు! ఖాళీ అరచేతులూ,
కొంచెం ఇవ్వలేని,
'నాక్కూడా' లేని రాత్రుళ్ళూ!