ఆవృత్తి

రెండు చేతులూ కట్టుకుని, తల వంచుకుని
ఇంటి వైపు నడుచుకుంటో ...
***
రాత్రి: పాదాలను చుట్టుకుంటూ సాగే గాలి,
నేలపై దొర్లే, రాలిన ఆకులు
వాటిపై ప్రతిఫలించే మసక వెన్నెల,

చుట్టూతా ఏవో శబ్ధాలు, గుసగుసలై, అంతా
సంకేత భాషై, "అనువదించుకో,
వీలైతే నన్ను" అని నువ్వు పలికినట్టైతే,

దూరంగా చీకట్లో ఇల్లు: ప్రార్ధనా మందిరమై,
ముకుళించిన కాంతిలో, ఒక
కంచమై, మంచినీళ్ళై, నిదురై, నువ్వైతే,
***
బడి నుంచి, తల్లి వెంటో పిల్లవాడు, ఏవేవో
కబుర్లు చెబుతూ సాగినట్టు,
ఇట్లా, నీ స్మృతితో, ఇంటివైపు నేను!