కఫం

ఎండ పొదిగే దినపు అండంలో
అతను; దగ్గుతో,
జ్వర తీవ్రతతో, వొణుకుతో -

గుండెలో కఫం; బయటికి రాకా,
లోపల ఉంచుకోలేకా
ఒక యాతన; ఎట్లా అయినా

బయటకి త్రోసివెయ్యగలిగితే
కొంచెం తెరపి;
శ్వాసాడవచ్చు; పడుకోవచ్చు ...

గుండెలో కఫం; అచ్చు నీలాగే,
లోపల ఉంచుకోలేకా,
అట్లా అని హృదయంలోంచి

బయటికి త్రోసెయ్యలేకా, త్రోసి
మరి, నిమ్మళంగా
ఉండాలేకా, ఓ తండ్లాట ...
***
ఎండ ఎంతో పొదిగి కన్న, ఒక
రాత్రిలో, అతనే;
దగ్గుతో, పదాలై వొణుకుతో!