అక్కడ

వేళ్ళని వేళ్ళతో తాకించి, తను
ఎంతోసేపు అట్లా,
ఏదో జ్ఞప్తికి తెచ్చుకునేందుకు
***
కుళాయిలోంచి నీళ్ళ  పడే శబ్దం
సింక్ లో, ఎండిన
పాత్రలూ, ప్లేట్లూ, గ్లాసులూ,

బాల్కనీలో, గాలికి ఊగుతో మరి
పిల్లల దుస్తులూ,
వాటి నీడలూ రాలిన ఆకులూ,

ఏవో పక్షి ఈకలూ, పొరై దుమ్ము,
లేకున్నా, ఎవరో
మెసిలినట్టు: (ఎవరూ లేరక్కడ)
***
ఇక, ఎప్పటికో తను తల తిప్పి
అటువైపు చూస్తే,
అక్కడ, మరి గూడు కట్టుకున్న

చీకట్లో,తనని పొదుగుతూ రాత్రి!