మళ్ళీ

"sorry. అస్సలు చూసుకోలేదు.
జారి పడిపోయింది"
అని అన్నది తను, ఎప్పటిలాగే

చాలా యధాలాపంగా: బయటేమో
చీకటి. పగిలిన ఒక
కుండై నెలవంక. స్థబ్ధుగా చెట్లు,

మసక కాంతిలో, అలసిన చేతులై
నీడలు. గాలి లేక
శ్వాసందక ఎవరో, తనని తాను

లోపలికి ఎగబీల్చుకుంటో తపిస్తో!
***
"sorry. అస్సలు చూసుకోలేదు.
జారి పడిపోయింది"
అని అన్నది తను: ఎప్పటిలాగే

ముక్కలు అయిన హృదయాన్ని
చిన్నగా ఏరుకుంటో
ఏమీ మాట్లాడనేలేదు అతను!