యధాలాపంగా

యధాలాపంగా  కర్టెన్ని పక్కకి తోసి
వెళ్ళిపోయావు నువ్వు ,
***
రాత్రి లోపలికి రాగా, గాలి గంటలు
మ్రోగాయి. చెక్కబల్లపై
కాగితాలు, కదిలి సర్ధుకున్నాయి -
ఎక్కడో రెక్కలు కదలగా

అంతా వేర్లు తడిచిన వాసన: శిలగా
మారినదేదో బ్రతికినట్టు
పువ్వై, గాలిలో జలదరించినట్టు
 ఒక చినుకై కురిసినట్టూ!
***
యధాలాపంగా కర్టెన్ని పక్కకి తోసి
వెళ్ళిపోయావు నువ్వు,
***
ఇక రాత్రంతా లోపల ఒక సరస్సు
ఒడ్డున వెన్నెల్లో నువ్వు!