బరువు

కాగితం ఎగిరిపోకుండా, దానిపై
పేపర్ వెయిట్
ఉంచి వెళ్ళావు నువ్వు,

బయట ఎంతో వెల్తురు. పిలిచే
చెట్లూ, అరిచే
పిట్టలూ గూళ్ళూ పూలూ

కొమ్మలూ: ఇక ఏదో వ్రాసుకున్న
కాగితం, అక్కడే
గాలికి విలవిలలాడుతూ,

చేతులు బయటకి అలా చాచి
మరి వెళ్లలేక,
బూజులో ఇరుక్కున్న ఒక

తూనిగై, రెక్కలు కుట్టుకుంటో!
***
చిన్నదే అయినా ఎంతో వొత్తిడి
ఇక్కడ: నీదే,
నీ అంచనాలదే! చూడు

పేపర్ వెయిట్ బరువుకి, మరిక 
ఈ హృదయం
నలిగి కమిలి ఓ ముద్రికయై!