ప్రతిధ్వని

ఊగుతోంది ఎండ, ఆకులపై
ఊయలై,
ఊయలలోని వాన పాపాయై -

నిద్రలో ఒత్తిగిల్లినట్టు, ఏవేవో
సవ్వడులు, చిన్నగా,
చుట్టూ నీ వక్షోజాల వాసన -

నేను దాగే గూళ్లేనా అవి మరి?
చెవి వద్ద ఎవరో
నవ్వినట్టు ఉండే జీవితమేనా

అది మరి? ఎక్కడి నుంచో ఇక 
రెండు కళ్ళూ , 
చేతులూ, పాదాలూ, లోపలికి

పొగమంచై మెల్లిగా వ్యాపిస్తే ...
***
ఊగుతోంది ఎండ, ఆకులపై
గుప్పిటలోంచి
ఎపుడో చేజారిన లేత వేలై,

తల్లి లేక గుక్కపట్టిన శిశువై!