senti

ఎక్కడినుంచో ఎగిరొచ్చి వాలి

నిన్నూ నన్నూ పొదుగుతోందీ రాత్రి: ఇక క్షణికమైన ఈ గూడంతా

ఓ గోరువెచ్చని కాంతి -
***
రెక్కలతో గట్టిగా అదుముకుంటావు
నువ్వు నన్ను, నీ గుండెకు దగ్గరిగా: ఇక ఎక్కడి నుంచో అడవిలో
చెట్ల కిందుగా, రహస్యంగా

రాళ్లను ఒరుసుకుంటూ సాగే

నీళ్ళ సవ్వడి. ఇక అప్పుడు, నెమ్మదిగా నాలోకి వ్యాపిస్తూ ముద్దు

పెట్టుకుంటావు నన్ను

నువ్వు: ఇక ఇక్కడ, మబ్బు పట్టిన

మసక ఆకాశం కింద వీచే, అవిసె చెట్ల హోరు. పూలు. తుంపర -

మూతలు పడే కళ్ల కింద

చల్లటి గాలి. అప్పుడే, చిన్నగా ఏదో 

అంటావు నువ్వు: ఇక, గాలీ తుంపరా, చీకటీ మట్టి వాసనా

కలగలిసిన ఓ జోలపాట

నాలో: ఊగుతోంది శరీరం ఒక

ఊయలై: నేల నుంచి నింగి దాకా, నింగి నుంచి నేల దాకా

చినుకులతో, రంగులతో

పాలపుంతలతో, కోటానుకోట్ల

చుక్కలతో, నీ వంటి ఒక ఒడిలో, ఒక స్మృతిలో, ఒక క్షణంలో

మరపులో, మెరుపులో -

***

ఎక్కడినుంచో ఎగిరొచ్చి వాలి

నిన్నూ నన్నూ వెచ్చగా పొదుగుతోందీ రాత్రి, మనం అనే

కాంతిలో మైమరచి -

ఓ సెనోరిటా, మరి ఇకనైనా

తలుపులు తెరచీ, కర్టెన్లు పక్కకి జరిపీ, కళ్లయినా తెరవని

లేతెరుపు ఆకాశాన్ని

లోపలికి పిలువవా నువ్వు? !