లోపల

1
ఏమీ చేయలేక, పూలకుండీలో
చీకటిని ఒంపాను. అది మిణుకుమనే ఒక చుక్కని
బహుమతిగా ఇచ్చింది -
2
నేలపై నుంచి వేడిమి: గాలి.
శరీరం నేల అయ్యిందో, నేలే శరీరంగా మారిందో మరి
తెలియదు కానీ

లోపల నువ్వు వదిలిన, కమిలిపోయిన
ఖాళీ గాలి -
3
గూటీలో లేని పక్షులు. ఊగే
నిశ్శబ్ధంలో లతలు. రాత్రిలో ఒంటరిగా ఒక వాగు, ఎండి
ఒక ఖాళీ గూడై

అన్నం ముద్దంత హృదయమై, ఒక నీటి
చుక్కకై తపించే గొంతై -
4
ఎవరో ఎక్కడో, ఎందుకో: నీకై -
లేవు వాళ్లకి పదాలు. లేవు వాళ్లకి శబ్ధాలంకారాలు. నువ్వు
సొమ్మిసిల్లినప్పుడు

నిన్ను అల్లుకుని, నిన్ను నాటి, పాదు చేసి
కాపాడే చేతులు తప్ప

ఒక మహా సరళత్వం తప్ప-
5
ఏమీ చేయలేక పుస్తకం తెరిచాను -
ఎగిరిపోయాయాయి అక్షరాలన్నీ ఎక్కడికో సీతాకోకచిలుకలై.
ఇక ఇక్కడ

ఓ ఖాళీ కాగితమై చీకట్లో తెల్లగా
మారి నేను: మరి వింటున్నావా అక్కడ నువ్వు , నీలోకి
కొట్టుకుపోబోయే

ఈ ఖాళీ కాగితాన్ని?