పునర్యానం

1
అతి తేలికగా వాలే రాత్రి సీతాకోకచిలుక: దాని నల్లని
రెక్కలపై మెరిసే తెల్లని చుక్కలు
కొంచెం కొంచెంగా నువ్వు అద్దిన
నీ శరీరపు చిరు పరిమళంతో -
2
అంతే తేలికగా ఊగే లతలు, అలసటతో పూలు. చెట్లు -
గాలిలో నువ్వు వ్రాసిన వాక్యాలేవో
నీ పెదవుల తడితో, నువ్వు ఇంకా
దిద్దని నా శరీరపు వ్యాకరణంతో -
3
అతి తేలికగా లేచే రాత్రి సీతాకోకచిలుక: దాని నల్లని
రెక్కలపై మెరిసే తెల్లని కలలు
చిన్న చిన్నగా మనం అద్దిన
మాటల ముద్రికలతో, స్మృతులతో -
4
అందుకే, ఇక వెళ్ళిపోతాను, వానతప్త హృదయంతో
నీకై, గూటికై, తపనతో, దాహార్తినై
ఒక శరణార్థినై, అక్షరాలు లేని
ప్రేమ అనే ఒక రహస్య లిపితో!