తప్పిదం

గింజలకై, నీళ్లకై, అక్కడక్కడే తిరుగుతున్నాయి, నాలుగు
పిచ్చుక పిల్లలు:
ఆవరణలో -
***
వేసవి: స్థంబించిన గాలి. కదలక అట్లా చెట్లు, ఒరిగి -
తపన: దాహంతో నింగికి చేతులు
చాచిన నేల. డస్సిపోయి గూళ్ళు -

పొరలు పొరలుగా దినం: ఎండమావై శరీరం. నువ్వు -
లేనితనం ఒక ముళ్ళ కంచై, నిత్యం
నిన్ను చుట్టుకుని కోసివేస్తూ ఉంటే
***
గింజలకై, నీళ్లకై అక్కడక్కడే తిరుగుతున్నాయి నీతో
నాలుగు పిచ్చుక పిల్లలు
నీలో, తనలో -
***
మరి
నగరమిది. యంత్ర అజగరమిది -
హృదయంలో ఓ మట్టిముంతతో, ఇన్ని నీళ్లతో ఇక్కడ
నీకై ఎవరో ఒకరు

వేచి చూస్తూ ఉంటారన్న
ఒక అందమైన అబద్ధాన్ని నీకు అమ్మి, నిన్నో హింసగా
మార్చింది ఎవరు?