గాలి

ఒక్క రాత్రి మాత్రమే
గుర్తుకు ఉంది. పూర్తిగా మరచిపోయాను, నువ్వు ఇక్కడ నాతో
ఉన్నావని -
***
పూలల్లో చేరిన మంచు
నీ కళ్ళల్లో: ఒక మూలగా ఒదిగిన నీ శరీరం, దీపం వెలగని
ఓ ఆలయం -

అరవిచ్చిన అరచేతుల్లో
నీ ముఖం: ఆకులు రాలి, మబ్బు పట్టిన ఆకాశం కింద కదిలే
నీడలేవో -

ఇక, ఖాళీ పాత్రలూ
నీళ్ళు ఒంపని మొక్కలూ, లతలూ నీ చేతులు: అంచులు లేని
నిశ్శబ్ధంలో అట్లా

స్థంబించి. మరి ఇది నిజం -
మరచిపోయాను పూర్తిగా, నువ్వు నాలో ఉన్నావనీ,
సమానంగా

గాయపడుతున్నావనీ, ఇంకా
ఈ రాత్రిని దాటాలనీ!
***
దా. ఒక్కసారి ముట్టుకో - గాలై, నీ శ్వాసతో
వెలుతురై బ్రతికిపోతాను