ఒక్క క్షణం

ఆకులన్నీ రాలిపోయి
ఒంటరిగా మసక వెన్నెల్లో అట్లా స్థాణువై, బూడిద రంగు
చెట్లు -
***
మట్టిదారిలో నెలవంక ఒకటి -
నీళ్ళ సవ్వడి లేకుండా నిశ్శబ్ధమై, డస్సిపోయి, ఒరిగిన
ఒక శరీరమై -

రాత్రిలో పూలకుండి ఒకటి
పగిలి: శ్వాస కాలేక, అక్కడక్కడే తిరిగి, ఖాళీ పాత్రల్లో
ఒదిగే గాలై, నువ్వై -

అలసిన ముఖం ఒకటి
ప్రకంపించే కాలంతో, ఎండిన సరస్సుల ఎదురుచూపై
మహా సవ్వడై -
***
ఆకులన్నీ రాలిపోయి
ఒంటరిగా మసక వెన్నెల్లో అట్లా స్థాణువై, బూడిద రంగు
చెట్లు -
మరి
***
ఇక ఈ రాత్రి, నీ హృదయానికి మిగిలిన దారి
ఏది?