last wish

అలసిపోయాను నేను. చాలిక -

కనురెప్పలపై నీడలు. లోపల పిడచ కట్టుకుపోయి
దాహం: పెదాలపై ఎడారి, గొంతులో
నడి వేసవి కత్తి -

నాకు తెలుసు, వడలిపోయాయి నీ పచ్చని చేతులు.
వొణుకుతోంది నీ శరీరం గోడపై ఊగే
ఎండిన లత వలే -

నేలపై దొర్లుతూ చిన్నగా సవ్వడి చేసే కాగితం పూవు
మన గూడు: చిన్నగా వెలిగే దీపపు
కాంతిలో ఒక క్షణమై -

అలసిపోయావు నువ్వు కూడా: చాలిక -

ఊరికే అట్లా ఉండు ఈ రాత్రికి నాతో: పాపవై, అమ్మవై-
ఉదయాన్నే ఇస్తాను నీకు, ప్రాణం
పోసుకున్న ఒక కాగితం

పువ్వునీ, వేసవి కుండ చుట్టూ చుట్టే, 'మనం' అనే
ఒక చల్లని వస్త్రాన్నీ!