టామీ

సాయంత్రం, నీళ్ళు చమ్కీలు వెలిగించిన ఆ పార్క్ లో

పరిగెడుతోంది పాపాయి రిమ్ జిమ్ మంటో
పాదాల చుట్టూ ధూళి దేవతల్ని
వెంట వేసుకుని, రివ్వు రివ్వున

చేతులు ఊపుకుంటూ, అరుచుకుంటూ, దుముకుతూ
మరకలు నిండిన, ఒక
తెల్ల కుక్కపిల్ల వెనుకగా

చుక్కలు చుట్టిన నల్లని రాత్రిలో మెరిసిపోతోన్న  ఒక
వెన్నెల వలయపు గౌనుతో

సర్రున రివ్వున ఝూమ్మున రిమ్ జిమ్ మంటో

గాలిలోంచి గాలిలోకి
గాలితో, మబ్బులతో
పోటీ పడుతూ ఉంటే        

గిర్రున తిరిగి తిరిగి
నవ్వుతో అలసి ఆ
కుక్క పిల్లను గాట్టిగా కావించుకుని మురిసి విరిసి
పోతా ఉంటె , 'విజ్జీ

ది డాగ్ ఈజ్ డర్టీ,
లీవ్ ఇట్. అది నిన్ను కరుస్తుంది' అని నువ్వు

నీ ఉన్నత వర్గ జాగ్రత్తను విడమరుస్తూ ఉంటే
ఇలా అంటుంది
ఆ చల్లని తల్లి
నీ కూతురు:  

"టామీ ఏమీ చేయదు కానీ
నాన్నా, మర్నువ్వే అరుస్తావ్
ఎప్పుడూ" అని అంటే, ఇక

ఆ సాయంత్రం తుళ్లిపడేలా ఎలా తుళ్లితుళ్లి నవ్వాను నేను?